Korrupsiya – uyushgan jinoiy guruhning shaxsiy boylik orttirish, davlat mulkini taqsimlash jarayonida uning bir qismiga, mamlakat iqtisodiy resurslariga ega bo‘lish maqsadida urug‘-aymoqchilik manfaatlarini davlat manfaatlaridan ustun qo‘yadigan davlat xizmati amaldorlar jinoyat sodir etilishini anglatadigan tushuncha. Korrupsiya lotincha so‘z bo‘lib aynish, poraga sotilish ma’nosini anglatadi va mansabdor shaxsning boyish maqsadida o‘z mansabi bo‘yicha berilgan huquqlarni bevosita suiiste’mol qilishidan iborat jinoyat hisoblanadi. Mansabdor shaxslarni sotib olish, ularning poraga sotilishi ham korrupsiya deyiladi.

Korrupsiya masalasi bilan BMT ham alohida shug‘ullanib, maxsus qarorlar qabul qilgan hamda bu tushunchaga quyidagicha ta’riflar berilgan:

1) mansabdor shaxslar tomonidan davlat mulkini o‘g‘irlash, talon-taroj qilish va o‘zlashtirish;

2) noqonuniy foyda olish uchun o‘z xizmat lavozimini suiiste’mol qilish;

3) ijtimoiy burch va shaxsiy ta’magirlik, manfaatlar o‘rtasidagi ziddiyat.

Korrupsiya jamiyat taraqqiyotiga xavf soluvchi tahdid hisoblanadi va mamlakatda ijtimoiy larza, iqtisodiy tanglikning vujudga kelishiga sabab bo‘lib, aholining ma’naviy kayfiyatiga salbiy ta’sir ko‘rsatadi. Shu boisdan O‘zbekiston mustaqillikka erishgan dastlabki kunlardanoq korrupsiyaga qarshi kurashga faol kirishib, tegishli chora-tadbirlar ko‘rmoqda. Farmonlarga binoan, ichki ishlar va prokuratura organlari tizimida korrupsiyaga qarshi kurash bo‘limlari tuzildi.

Korrupsiyaga qarshi kurashning eng muhim yo‘llaridan biri davlat boshqaruvi organlari rahbar xodimlari ma’naviyatini oshirish, ularni vatanparvarlik, mas’uliyatlilik ruhida tarbiyalash bo‘yicha ma’rifiy ishlarni kuchaytirish hisoblanadi. Shuningdek, korrupsiyaga qarshi kurashda jahon hamjamiyati bilan birgalikda harakat qilish lozim bo‘ladi. Shu boisdan ham O‘zbekiston Respublikasi BMTning korrupsiyaga qarshi kurash konvensiyasiga qo‘shilgan va bugun yurtimizda unga qarshi kurash bormoqda.