Kecha Nobel mukofoti oʻz egalariga topshirildi.

Maʼlumot uchun, 10-dekabr Alfred Nobel vafot etgan kun hisoblanadi. Aynan mazkur sana munosabati bilan har yili tantanali marosim boʻlib oʻtadi.

Nobel mukofotining bu yilgi sovrindorlari quyidagilar:

▪️ Tibbiyot boʻyicha — amerikalik olimlar Viktor Ambros va Geri Ravkan (mikroRNKni kashf qilgani uchun);

▪️ Fizika boʻyicha — amerikalik Jon Hopfild hamda britaniya-kanadalik Jeffri Hinton (sunʼiy neyron tarmoqlari yordamida Machine Learningʻning asosini tashkil etuvchi fundamental kashfiyotlar va ixtirolar uchun);

▪️ Kimyo boʻyicha — Devid Beyker, Demis Xassabis va Jon Jamper (oqsilning uch oʻlchamli tuzilishi prognozi» va «oqsilning kompyuter dizayni uchun);

▪️ Adabiyot boʻyicha — Janubiy koreyalik yozuvchi Han Kangga (tarixiy jarohatlarga qarshi kurashadigan va inson hayotining nozikligini ochib beradigan taʼsirli sheʼriy nasri uchun);

▪️ Tinchlik uchun — Nihon Hidankyo tashkilotiga (Hirosima va Nagasakidagi atom bombasidan omon qolganlarni birlashtirgani uchun);

▪️ Iqtisodiyot boʻyicha — Daron Ajemoʻgʻli, Saymon Jonson va Jeyms Robinsonga (institutlarning shakllanish jarayonlari va ularning iqtisodiy farovonlikka taʼsirini tadqiq qilgani uchun).

Joriy yilda mukofot puli 11 mln shved kronasini (1 mln dollarga yaqin) tashkil etgan.

Nobel mukofotini birinchi topshirish marosimi 1901-yil 10-dekabrda oʻtkazilgan boʻlib, shundan beri 1000 ga yaqin nomzod va tashkilotlar uning laureatiga aylangan.