2024/2025-oʻquv yili uchun oliy va professional taʼlim muassasalariga oʻqishga kirish test sinovlari 14-iyuldan boshlanadi.

Bunda test sinovlari kuniga 2 smenada tashkil etiladi.

▪️ 1-smena – soat 08:00 da;

▪️ 2-smena – 15:00 da boshlanadi.

“Abituriyentlardan test sinovlari boshlanishidan kamida bir yarim soat oldin belgilangan hududga yetib kelishlari talab etiladi”, – deyiladi xabarda.

Xabarga koʻra, abituriyentlar onlayn yuklab olgan oʻzlariga tegishli “Abituriyent ruxsatnomasi”ni qogʻoz variantda taqdim etadi.

Ular ruxsatnomada belgilangan manzildagi bino, koʻrsatilgan sana va smena boʻyicha test sinovlarida ishtirok etadi.

Abituriyentlar test sinoviga pasport (ID-karta) va abituriyent ruxsatnomasi bilan belgilangan vaqtdan kechikmagan holda kelishlari lozim.

“Pasport nusxasi yoki boshqa hujjatlar bilan kelgan, shuningdek, kechikib kelgan abituriyentlar test sinovlariga kiritilmaydi!” – deyiladi xabarda.

Oldinroq abituriyentlar testga nimalarni olib kirishi mumkinligi, ularga ruxsatnomalar berish boshlangani hamda imtihon jarayonida hayajonlantiradigan TOP-3 sabab haqida xabar berilgan edi.