Bugun, 10-dekabr kuni Respublika Maʼnaviyat va maʼrifat markazi tomonidan bir qator vazirlik va idoralar bilan hamkorlikda “Shuhrating porlasin toki bor jahon!” shiori ostida bayram tadbiri tashkil etildi.

Oʻzbekiston Respublikasi Davlat madhiyasi qabul qilinganining 30 yilligiga bagʻishlangan anjuman Milliy gvardiyaning Maʼnaviyat va maʼrifat markazida boʻlib oʻtdi.

Tadbir avvalida Respublika Maʼnaviyat va maʼrifat markazi rahbari, senator Minhojiddin Mirzo soʻzga chiqdi:

– Milliy ozodligini qoʻlga kiritgan, milliy taraqqiyotining tarixiy bosqichiga qadam qoʻygan har bir xalq Vatanining shonli oʻtmishi, buguni va kelajagi, orzu-intilishlarini mujassam etgan davlat ramzlarini qabul qiladi. Bu ramzlar davlat suverenitetining oʻziga xos shahodatnomasidir. Madhiya – millatni hamisha oʻz ozodlik yoʻlida, ahdida sobit tutib turuvchi ruhiy quvvat manbai ham. Shu bois dunyo xalqlari oʻz madhiyasini nafaqat tantanali va munavvar kunlarida, hatto eng zahmatli va sinovli onlarida ham tik turib mardona kuylaydi. Madhiya millatni birlashtiradigan, yuksaltiradigan, yengilmas kuchga, yuksak iroda va qatʼiyat, jasorat timsoliga aylantiradigan qoʻshiqdir.

Oʻzbekiston kompozitorlari va bastakorlari uyushmasi raisi Rustam Abdullayev 30 yil avval Davlat madhiyasining qabul qilinish jarayonini eslab, koʻpchilikka qiziqarli boʻlgan faktlarni tilga oldi. Gimn musiqasining oʻziga xos jihatlariga toʻxtalib, milliy navolarimiz yoʻlida ulugʻvor va tantanavor ohanglarga qurilganini taʼkidladi.

Mamlakatimizda maʼnaviy-maʼrifiy ishlarni amalga oshirish, yuksak ijtimoiy-maʼnaviy muhitni shakllantirish yoʻlidagi fidokorona mehnatlari uchun bir qator yurtdoshlarimizga “Maʼnaviyat fidoyisi” koʻkrak nishoni topshirildi.

Shahnoza Saotova, Adliya vazirining maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha maslahatchisi

Gulbahor Erqulova, Oʻzbek milliy maqom sanʼati markazi Yunus Rajabiy nomidagi “Maqom” ansambli oliy toifali artist maqomchisi

Salohiddin Azizboyev, Yunus Rajabiy nomidagi Oʻzbek milliy musiqa sanʼati instituti professori

Dilorom Karimova, Oʻzbekiston Respublikasi xalq artisti

Isamat Ergashev, Oʻzbekiston Respublikasida xizmat koʻrsatgan madaniyat xodimi

Dilfuza Rahimova, Oʻzbekiston Respublikasida xizmat koʻrsatgan artist

Zamira Suyunova, Yunus Rajabiy nomidagi Oʻzbek milliy musiqa sanʼati instituti dotsenti

Javdat Poʻlatov, Oʻzbekiston davlat jahon tillari universiteti katta oʻqituvchisi, pedagogika fanlari boʻyicha falsafa doktori (PhD)

Dilorom Bobojonova, Oʻzbekiston davlat jahon tillari universiteti professori, tarix fanlari doktori

Muzaffar Ortiqov, filologiya fanlari nomzodi, dotsent

Munavvarxon Usmonova, “Saodat” jurnali bosh muharriri, shoira

Bayram arafasida Respublika Maʼnaviyat va maʼrifat markazi tomonidan Oyina.uz portali platformasida “Shuhrating porlasin toki bor jahon!” mavzusida Davlat madhiyasini jamoaviy joʻr boʻlib kuylash tanlovi hamda onlayn viktorina oʻtkazildi. Shuningdek, Badiiy akademiya bilan hamkorlikda “Ranglarda aks etgan Vatan madhi” mavzusida rasmlar tanlovi ham tashkil qilindi. Tantanali tadbir doirasida barcha gʻoliblarga qimmatbaho sovgʻalar va pul mukofotlari taqdim etildi.

El suygan xonandalar ijrosidagi kuy-qoʻshiqlar, Ichki ishlar vazirligi, Milliy gvardiya hamda Mudofaa vazirligining ashula va raqs ansambllari chiqishlari tomoshabinlarga bayramona kayfiyat ulashdi.

Oʻzbekiston Respublikasi Davlat madhiyasi qabul qilinganining 30 yilligiga bagʻishlangan shu kabi tantanali tadbirlar butun mamlakat boʻylab davom etmoqda.