Bolani yoshligidan badiiy tafakkur qilishga o‘rgatish, iste’dodini yuzaga chiqarish uning intellektual rivojida muhim omil sanaladi. O‘zbekiston Respublikasi Prezidentining 2021-yil 26-martdagi “Ma’naviy-ma’rifiy ishlar tizimini tubdan takomillashtirish chora-tadbirlari to‘g‘risida”gi PQ-5040-sonli qaroriga muvofiq,  o‘tgan  o‘quv yilidan boshlab o‘rta umumta’lim maktablarida ijodiy-madaniy masalalar bo‘yicha targ‘ibotchi lavozimi joriy etildi.

Ushbu lavozim ta’lim muassasalarida madaniy-ma’rifiy ishlar samaradorligini oshirish, iqtidorli o‘quvchilarning  ijodiy qobiliyatini aniqlash, uni ro‘yobga chiqarishni ko‘zda tutadi. Aytaylik, bugun “Yosh ijodkorlar” to‘garagiga qatnashayotgan hamma bolalar ham kelajakda  shoir-yozuvchilikka da’vo qilmas, lekin ular bu muhitda ma’rifatli-ma’naviyatli insonlar bo‘lib ulg‘ayishi tabiiy.

O‘zbekiston Respublikasi Xalq ta’limi vazirligi, Respublika Ma’naviyat va ma’rifat markazi, O‘zbekiston Jurnalistlari ijodiy uyushmasi va O‘zbekiston Yozuvchilar uyushmasining 2020-yil 28-dekabrdagi “Umumiy o‘rta ta’lim muassasalarida Ijodiy-madaniy masalalar bo‘yicha targ‘ibotchi lavozimini joriy etish to‘g‘risida”gi qo‘shma qaroriga asosan umumta’lim maktablarida ijodiy-madaniy masalalar bo‘yicha targ‘ibotchi 0,5 shtat birligi joriy etildi. Bugungi kunda ryespublika bo‘yicha o‘n ming nafardan ortiq targ‘ibotchilar faoliyat  ko‘rsatmoqda. Ulardan  qariyb yarmi yozuvchi-shoirlar, jurnalistlar va madaniyat xodimlari hissasiga to‘g‘ri kelsa, qolgan yarmi ona tili va adabiyot hamda boshqa fan o‘qituvchilaridan iborat.

Qo‘shma qarorga ko‘ra ijodiy-madaniy masalalar bo‘yicha targ‘ibotchining asosiy vazifalari belgilab berilgan. Ammo ushbu yo‘nalish yangi soha bo‘lganligi sababli, uning faoliyat doirasini yanada aniqlashtirish maqsadida seminar-treninglar o‘tkazish va kerakli qo‘llanma chop etish zarurati bor edi. O‘tgan yilning 22-23-noyabr kunlari Respublika Ma’naviyat va ma’rifat markazi tomonidan O‘zbekiston Respublikasi Xalq ta’limi vazirligi va O‘zbekiston Yozuvchilar uyushmasi hamkorligida targ‘ibotchilar ishtirokida o‘tkazilgan amaliy seminar-trening ko‘p masalalarga yechim bera oldi.   

Ikki kun mobaynida targ‘ibotchilarga o‘z sohasining yetuk mutaxassislari, jumladan, xalqaro sertifikatga ega trenerlar, yozuvchi-shoirlar tomonidan mahorat darslari o‘tkazildi, taqdimotlar uyushtirildi. Mashg‘ulotlarda targ‘ibotchilar ham amaliyot davomida orttirgan tajribalari va taklif-mulohazalarini hamkasblari bilan o‘rtoqlashdi. Tayyorlangan trenerlar 13-28-dekabr kunlari oralig‘ida barcha hududlarda targ‘ibotchilar uchun seminar-treninglar tashkil etishdi. Endilikda trenerlar tomonidan qishki ta’til davrida tuman (shahar)larda targ‘ibotchilarni jadval asosida, o‘qitish ishlari olib borilmoqda. Xalq ta’limi vazirligi, Jurnalistlar ijodiy uyushmasi va Yozuvchilar uyushmasining takliflari hamda joylardagi targ‘ibotchilar bildirgan fikrlar bir yerga jamlanib, uslubiy qo‘llanma loyihasi  ham tayyorlandi. U joriy yilda  chop etilib, barcha targ‘ibotchilarga tarqatiladi.

Ayni paytda har bir hududda ijodiy-madaniy masalalar bo‘yicha targ‘ibotchilarning o‘z telegramm guruhlari yoki kanallari (masalan: “Andijon targ‘ibotchilari”, “Xorazm targ‘ibotchilari” va hokazo) ochildi. Ushbu guruhlar jami 9175 nafar targ‘ibotchini qamrab olgan. Targ‘ibotchilar o‘rtasida har yili “Yilning eng namunali ijodiy-madaniy masalalar bo‘yicha targ‘ibotchisi” tanlovini tashkil etish ham  rejalashtirilmoqda.

Targ‘ibotchilarning maktablarga kirib borishi avvalo u yerdagi ijodiy muhitni jonlantirdi. Iqtidorli o‘quvchilar bilan ishlashning aniq mexanizmlari yaratildi. Mamlakatimizdagi barcha maktablarda “Yosh ijodkorlar” to‘garaklari tashkil etilib, o‘quvchilarning  ijod namunalari mahalliy va markaziy ommaviy axborot vositalari orqali yoritilmoqda. Bu ham yoshlarga katta ma’naviy rag‘bat bo‘layotir. Yaqinda Respublika Kasaba uyushmalari tomonidan uyushtirilgan “Mening Prezidentim” ijodiy ishlar tanlovida aynan ana shu to‘garak vakillaridan 5 nafari ryespublika bosqichida ishtirok etib, sovrinli o‘rinlarni qo‘lga kiritdi.

Xulosa qilib  aytadigan bo‘lsak, dastlabki qadamlar ancha samarali bo‘ldi, deyishga to‘la asosimiz bor. Bu xayrli tashabbus ertangi kunda yanada salmoqli natijalar berishiga shubha yo‘q.

                                                                      To‘xtasin ARSLONOV,

          Respublika Ma’naviyat va ma’rifat markazining

Ta’lim muassasalari bilan ishlash bo‘limi boshlig‘i