02:15 / 15.07.2024
675
0
“Maʼnaviyat festivali” – nafaqat mezbon Qoraqalpoq xalqiga, balki ijodiy jamoa va tashkilotchilarga ham maʼnaviyat, maʼrifat va albatta, madaniy hordiq ulashmoqda
“Maʼnaviyat festivali”ning Qoraqalpogʻistondagi navbatdagi kuni odatdagidan-da sermahsul oʻtdi.
Ijodiy jamoa “Maʼnaviyat festivali”ni oʻtkazish uchun Kegeyli tumani tomon yoʻl oldi.
Birinchi manzil – tumandagi Yoshlar ishlari agentligi boʻldi. Ilk loyiha – “Milliy birdamlik” doirasida xonandalar mashhur qoʻshiqlari, shoir-shoiralar ajoyib sheʼrlari, teatr aktyori va boshqa ijodkorlar esa bayram tabrigi, tilaklari va mamlakat bilan bogʻliq iliq xotiralari bilan davraga bayramona kayfiyat ulashdi.
Mehmonlar shuningdek, millat tarixi, gʻururi va madaniyati haqida gapirib, eʼtirof etdi.
“...Bir narsani bildimki, bu yurtdagi har bir inson qahramon ekan”, deya gap boshladi birinchilardan soʻzga chiqqan falsafa fanlari doktori, shoira Shahlo Ahrorova.
Tadbirda tomoshabinlar shoʻx qoʻshiqlarga raqsga tushib, fidokorona yordam bergan tashkilotlar tuman hokimi tomonidan esdalik sovgʻa va tashakkurnomalar bilan taqdirlandi.
“Maʼrifat soati” Xalqobod MFYdagi kutubxonada boʻlib oʻtdi. Ushbu manzilda avvaliga Qoraqalpoq xalqining boy madaniyatini aks ettirgan qoʻl ishlari koʻrgazmasi bilan tanishildi. Keyin esa minglab adabiyotlar joy olgan kutubxonada sheʼrxonlik va samimiy suhbat boʻlib oʻtdi.
Binoning turli tadbirlar uchun moʻljallangan faye qismida esa xonandalar mehmon va tomoshabinlarni oʻz diltortat xonishlari bilan kutib oldi.
Ijodiy jamoa tadbirlardan ortib, ziyorat va Qoraqalpoqning boy tarixini oʻrganish uchun Ishanqalʼa obidasiga bordi. Ushbu yodgorlik bilan Qoraqalpogʻiston xalq shoiri Halila Dauletnazarov tanishtirdi.
Ishanqalʼa bir vaqtlar masjid, madrasa, kutubxona, talabalar yotoqxonasi va karvonsaroy vazifasini oʻtagan. Bugungi kunda ushbu manzil hech qanday restovratsiyasiz, asl holida saqlanib turibdi.