Yangi 2023-yilning kirib kelishiga ham oz fursat qoldi. Yil yakunida quvonchli, unutilmas voqealarni eslash, xatolardan xulosa qilishning ayni vaqti. Afsuski, bu yil sanʼat vakillari orasida koʻpchilik vafot etdi. Umrini sanʼat, madaniyat sohasiga bagʻishlagan insonlarning ayrimlari esa yilni ogʻir xastaliklar bilan kurashib oʻtkazmoqda. Oyina.uz sinovli kunlarni boshdan kechirayotgan, turli kasalliklar bilan kurashayotgan sanʼatkorlar haqida maʼlumot beradi.

Bu yil Oʻzbekistonda xizmat koʻrsatgan artist Raʼno Shodiyeva uchun anchayin ogʻir keldi. Aktrisa ogʻir dard, jigar saratoni bilan kurashmoqda. Aktrisa dard boshlanishini u quyidagicha eslaydi:

“Alloh menga shunday bir sinov berdi. Hozir shu sinovni chiroyli yengib oʻtishga harakat qilmoqdaman, Men juda ogʻir ahvolda edim. Shifokorlarning aytishicha, ikki-uch oylik umrim qolgan ekan, kasallikni vaqtida payqabman. Hammasi xuddi kinodagidek boʻldi. Moskva shahriga Xalqaro “Kar-soqovlar jamiyati”ning Kongressiga, Oʻzbekiston nomidan borgan edim. Qizil maydonni aylandim, Instagramʻda obunachilarim bilan jonli muloqot qildim. Kremlda gala-konsertlarda qatnashib, ertasi kuni Oʻzbekistonga uchib kelishim kerak edi”, — deydi u.

Buni qarangki, xasta boʻlishiga qaramay yil davomida uning yangi obrazlari tele ekranlardan tushmadi. Kuni kecha boʻlib oʻtgan “Oltin Humo” - 2022 milliy kinotaqdimotida “Eng yaxshi ayol roli” nominatsiyasida “Ayol qismati” filmidagi bosh roli uchun Raʼno Shodiyeva taqdirlandi. Taqdirlash marosimida ishtirok eta olmagan aktrisaga tadbir qatnashchilari salomatlik tiladi.

Rametovlar – sanʼatkorlar oilasi ekani sir emas. Joriy yilda oila boshi Oʻzbekistonda xizmat koʻrsatgan artist Jumadulla Rametovning alsgeymer xastaligiga chalingani maʼlum boʻldi. Uning oʻgʻli aktyor Aziz Rametovning soʻzlariga koʻra, otasi maʼlum vaqt xotirasini ham yoʻqotgan. Kasallik boshlanganiga esa ikki yil boʻlgan. Shuningdek, ushbu kasallikning kelib chiqishi asab tizimi bilan bogʻliqligi hamda kasallikning ikkinchi bosqichiligi va u kun sayin ogʻirlashayotganini taʼkidlagan.

Oʻzbek sanʼatining dargʻalaridan boʻlmish Oʻzbekistonda xizmat koʻrsatgan artist Saida Rametova ham Turkiyada “Jaloliddin Manguberdi” serialida suratga tushib, Toshkentga qaytgach, koʻkrak bezi saratoniga chalinganini maʼlum qilgandi. Aktrisa shu zahotiyoq davolanishni boshlagan. Oʻzbek milliy akademik drama teatri maʼmuriyatining xabar berishicha, ayni vaqtda ham Saida Rametova davolanishni davom ettirmoqda. Uning salomatligi yaxshi. Joriy yilning 21-sentyabr kuni 63 yoshni qarshilagan sanʼatkor, xastalik bilan kurashish davomida ham katta sahnani tark etgani yoʻq. Hozirgi kungacha katta-kichik rollarni oʻynab kelmoqda.

Kuz oyi sobiq “Ummon” guruhi uchun ham sinovli kunlarga toʻla boʻldi. Bir necha yillardan buyon saraton kasalligi bilan kurashib kelgan guruh aʼzosi Jasur Rafiqov vafot etdi. Guruhning yana bir sobiq aʼzosi Zohid Risqiyev boshqaruvidagi BMW rusumli avtomobil Toshkentda YTHga uchradi. Hodisa oqibatida bir kishi vafot etdi. Avtomashina boshqaruvchisi Zohid Risqiyevga “Bosh miya ochiq jarohati. Bosh miya lat yeyishi. Bosh tepa sohasining ezilib yirtilgan jarohati. Chap yelka sohasi yumshoq toʻqimalari lat yeyishi. Koma 1−2 daraja” tashxisi qoʻyilgan. Bir nechta jarrohlik amaliyotlarini boshidan oʻtkazgan xonanda katta ehtimol bilan yangi yilni kasalxonada shifokor nazoratida kutib oladi.

Yosh boʻlishiga qaramay Kinematografiya agentligi “Hujjatli va xronikal filmlar kinostudiyasi” direktori Furqat Usmonov 2022-yilni ogʻir xastalik bilan kurashib nihoyalamoqda. Gap shundaki 31 yoshli kinoijodkor jigar saratoni bilan ogʻrigan. Biroq u ijod qilishdan bir daqiqa ham toʻxtagani yoʻq. Xususan u “Xalq yuragi” hujjatli filmida, shu nomdagi turkum filmlardan “Alisher Navoiy”, “Abdulla Oripov” hujjatli filmlarida muallif, “Inson”, “Adolat manzili”, “Mustahkam” va “Muqaddas burch” filmlarida muallif va rejissyor sifatida ishladi. Shuningdek joriy yilda bir qator milliy hamda xalqaro kinofestivallarda sovrindor boʻldi. 

Oʻzbekistonda xizmat koʻrsatgan artist Mashrab Kimsanov 4 yildan buyon bemor. Ijodkor shu kunga qadar 4 marotaba insultni boshdan kechirgan va ayni damda gapirolmaydi hamda mustaqil harakatlanolmaydi. Turmush oʻrtogʻi bergan intervyularining birida uni hatto joyidan koʻchirish ham mumkin emasligini taʼkidlagan.

“Toʻshakka mixlanib, oyoq-qoʻllari ishlamay qoldi. Bunday bemorlarni joyidan koʻchirib boʻlmaydi deyishgani uchun bir muddat vodiyda davolatdik. Undan keyin Toshkentga olib kelib, bu yerda ham uzoq muolajalarni oldi. Ammo hozircha oʻzgarish yoʻq”, deydi ijodkorning ayoli.

Afsuski 2022-yilda xalqimizning sevimli aktyori Murod Rajabov yangi rollarini namoyish eta olmadi. Gap shundaki 73 yoshli ijodkor uzoq yillardan buyon qandli diabet kasalligi bilan kurashadi. Biroq bu haqda biron marotaba aktyor yoki uning yaqinlari intervyu bermagan. Bizdagi maʼlumotlarga koʻra Murod Rajabov ham Mashrab Kimsanov kabi toʻshakka mixlangan, erkin harakatlana olmaydi.

Oyina.uz jamoasi ayni vaqtda turli ogʻir kasalliklar bilan kurashayotgan sanʼat, madaniyat vakillariga salomatlik tilagan holda tezroq ijodga qaytishlariga umid qiladi.