Агрессия (лотинча aggressio – ҳужум) –

1) бирон-бир бузғунчи ғоя, вайронкор мафкурага таяниб амалга ошириладиган информацион-психологик ҳужум, ахборот хуружи, ғоявий террор ёки маънавий-мафкуравий бузғунчилик;

2) сиёсий маънода, бир давлат томонидан ўзга давлатга уни мустақиллигидан, ҳудудий яхлитлигидан ва тараққиётидан маҳрум қилиш, халқини қарам этиб, бойликларини эгаллаш мақсадида ҳарбий куч ёрдамида амалга ошириладиган босқинчилик.

Халқаро ҳуқуқда БМТ Низомини очиқчасига бузган ҳолда бошқа давлатга нисбатан ҳарбий куч ишлатиш агрессия дейилади. Жиноят ҳуқуқига кўра, ён-атрофдаги одамларга жисмоний зарар ёки руҳий шикаст етказишга қаратилган ҳаракат агрессия деб баҳоланади. Бу ҳаракатлар ғаразли мақсадлар – бошқаларнинг бойлигига кўз олайтириш, уларни қарам қилиш ниятида содир этилади. Агрессия геноцид, террор, этник ва ғоявий асосдаги қонли можаролар шаклида ҳам намоён бўлади. Бугунги кунда иқтисод соҳасидаги агрессияга, иқтисодий, маънавият соҳасидаги агрессияга эса маънавий агрессия дейилади. Ҳар қандай ҳолатда ҳам бошқаларга нисбатан биринчи бўлиб ҳарбий куч ишлатиш, тажовузкорликни амалга ошириш агрессия деб баҳоланади. Турли шаклдаги ташқи ва ички агрессияга йўл қўймаслик учун аҳоли, айниқса, ёшларни юксак маънавий тамойиллар асосида, ҳушёр ва огоҳ этиб тарбиялаш муҳим аҳамият касб этади.