Варварлик – Маънавият талабларига зид ҳолат бўлиб,

1) ижтимоий тараққиёт тўғрисидаги баъзи назарияларда жамиятнинг ривожланиш босқичларидан бири;

2) қадимги юнонлар томонидан уларга тили нотаниш бўлган қабилаларга берилган ном;

3) замонавий нуқтаи назардан қараганда – нодон, жоҳил ва шафқатсиз одамлар фаолияти

каби маъноларни англатувчи тушунча ЮНЕСКО қарорига биноан инсониятнинг ноёб тарихий обидалари қаторига киритилган Афғонистоннинг Бомиён вилоятидаги қадимги Будда ҳайкалининг толибонлар томонидан замбараклар билан ўққа тутиб, вайрон этилиши варварликнинг энг ачинарли кўринишидир.

 Илм-фанда бу атама биринчи бор америкалик антрополог Л.Морган томонидан қўлланган. Унинг фикрича варварлик, тарихий маънода, жамият ривожидаги ибтидоий жамоа тузумининг ёввойиликдан кейинги ва цивилизациядан олдинги иккинчи даврини ифодалайди. Мазкур тушунча ҳақида шотландиялик файласуф А.Фергюссон 1767 йили чоп этилган «Фуқаролик жамияти тарихи бўйича эссе» китобида фикр юритиб, жамият тараққиётининг цивилизацияли босқичи ёввойилик ва варварлик босқичлари негизида вужудга келганини уқтиради. Тажовузкор сиёсат олиб борган давлат ёки уруш тарафдорларига нисбатан ҳам варварлик атамаси ишлатилади. Масалан, Иккинчи жаҳон уруши даврида фашистлар томонидан минглаб шаҳар ва қишлоқларнинг вайрон этилгани, миллионлаб кишиларнинг қириб ташлангани варварликнинг шафқатсиз ифодасидир. Бугунги кунда баъзи Ғарб мамлакатларида ёшлар томонидан содир этилаётган бузғунчи хатти-ҳаракатлар, турли шаҳарларда уйлар, транспорт воситаларининг ёқиб юборилаётгани, тобора кучайиб бораётган одам савдоси кабилар ҳам бунга мисол бўлиши мумкин.