Сциентизм (лотинча scientia – билим, фан) – илмий билим инсоннинг энг олий қадрияти, деган тасаввур берувчи йўналиш. Сциентизм учун илм-фанни мутлақлаштириш, уни ҳаётнинг бошқа шаклларига қарама-қарши қилиб қўйиш ва унга барча муаммоларни ҳал қилиш воситаси сифатида ёндашишдир.

Сциентизм икки хил кўринишга эга: 1) аксиологик кўринишда илм-фан маданиятнинг энг юксак қадрияти деб тушунилади, инсон ўз фаолиятида маданиятнинг фақат шу шаклига таяниши лозим, деган ғоя илгари сурилади. Бу ёндашувга кўра, ижтимоий ва маданий тараққиёт илм-фан ривожланиши маҳсулидир; 2) методологик сциентизм бўлиб, аниқ ва табиий фанларни мутлақлаштириб, уларнинг услубларини универсал, деб ҳисоблайди ва улар бошқа соҳалар, жумладан, гуманитар фанлар учун хам асос сифатида хизмат қилиши лозим, деган фикрни илгари суради. Ҳозирги даврда илм-фаннинг жадал ривожланиши, ишлаб чиқаришга янги технологиялар, компьютер техникаларининг кириб келиши сциентистик дунёқарашнинг кучайишига сабаб бўлди.