Музей – тарихий моддий ва маънавий ёдгорликларни тўплаш, сақлаш, ўрганиш ва тарғиб қилиш ишларини амалга оширувчи илмий тадқиқот, маданий-маърифий муассаса. Унинг асосий вазифаси инсонларни маънавий, эстетик, маданий, илмий, сиёсий, иқтисодий ва ҳоказо эҳтиёжларини қондиришдан иборат. Музейлар соҳалар бўйича адабиёт, тарих, маданият, санъатшунослик, табиатшунослик, қишлоқ хўжалиги, техникага оид ва бошқаларга бўлинади. Ижтимоий вазифасига кўра эса маънавий-маданий, илмий тадқиқот ва ўқув музейларига бўлинади. Музейлар ўз экспонатлари (санъат дурдоналари, моддий ва маънавий ёдгорликлар) орқали инсонларни маънавий-маданий эҳтиёжини қондиради, уларга эстетик завқ бағишлайди, тарихий ҳақиқатни ошкор этади, дунёқараш ва дидни ўстиради. Музейда илмий тадқиқот ишлари ҳам олиб борилади: қадимги моддий ва маънавий ёдгорликларни, айниқса, қўлёзмаларни, тўпламларни бутлаш ва ўрганиш; илмий ҳужжатларни тайёрлаш, музей ашёларини сақлаш ва таъмирлаш тартибини яратиш, адабиётлар нашр этиш шулар жумласидандир. Музейлар кишиларни тарихдан бохабар этиб, ўзига хос сабоқ беради. Ўқув масканлари ва бошқа муассасаларда ташкил этилган музейлар уларнинг тарихи ва фаолиятини ўзида акс эттиради. Замонавий музейлар тадқиқот, таълим-тарбия ва маънавий-маърифий тарғибот ишларини ўзаро уйғун ҳолда амалга оширадиган маданият ўчоғидир.