Миллий биқиқлик, миллий маҳдудлик – ўз миллатини ўзга миллатлардан узоқлаштириш, унинг ўзига хослигини ҳимоя этишни тор тушуниб, миллий худбинликни жорий қилиш, ўз миллатининг ўзга миллатлар билан эркин алоқада бўлишига путур етказиш. Миллий анъаналар ҳозирги замондаги иқтисодий, сиёсий ва маданий-маънавий алоқаларнинг моҳиятини тушунмаслик ва уни юзаки талқин этиш маҳсулидир. Ҳозирги замон тараққиёти шундайки, миллатлар, минтақалар, қитъалар, мамлакатлар ва халқлар ўзаро муносабатларга киришиб, ҳар томонлама яқинлашмасдан ривожлана олмайди. Ана шундай яқинлашиш ва бошқа мамлакатлар ҳамда халқларнинг энг яхши ютуқларини ўзлаштириш ҳар бир миллат гуллаб-яшнашининг зарурий шартидир. Барча ривожланган давлатлар ва миллатлар шу йўлдан бормоқдалар. Аммо бундай ўзлаштириб олиш ижодий равишда амалга оширилмоғи ва ўзлаштираётган миллатнинг ўзига хослиги, унинг тили, маданияти ва анъаналарига путур етказмаслиги керак. Шунингдек, миллий биқиқлик миллатларнинг ўзаро тенглигини, миллий маданиятларнинг бир-бирини тўлдириб келишини инкор этиб, ўз миллатини бошқа миллатлардан устун кўриб, бошқа миллатларнинг ҳақҳуқуқларини, маданияти ва маънавиятини ўзлаштириш ҳисобига ўзининг миллатига улкан имтиёзлар яратишга интилиш, унинг манфаатларини бошқа миллатлар манфаатларидан афзал кўриш, ўз миллатига сажда қилиб, унга ҳамду санолар ўқиш, кўкларга кўтариб, унга холисона баҳо беролмаслик, мавжуд камчиликлар ва нуқсонларини сезмаслик ва кўрмасликдир. Миллий биқиқлик ҳам миллатпарастлик сингари миллатнинг ўсиши, гуллаб-яшнаши учун энг кўп қийинчиликлар туғдирувчи, унинг ривожига тўсиқ бўлувчи омиллардан биридир. Миллий биқиқлик руҳи билан суғорилган киши гўёки ўзича ўз миллатига жон-жахди билан хизмат қилаётгандек кўринади, лекин у миллат таназзули учун хизмат қилаётганлигини ўзи ҳам гоҳида сезмайди. Чунки, у ўзининг қарама-қарши фикрлари ҳамда ножоиз хатти-ҳаракатлари билан ўз миллатини бошқа миллатлардан, жаҳон ҳамжамиятидан узоқлаштиради, миллатнинг ривожини сустлаштиради.

Ҳозирги замон фани, техника ва технологияси шундай суръатлар билан ривожланмоқдаки, бундай шароитда ўз миллати учун самарали хизмат қилмоқ учун миллий биқиқлик қобиғидан чиқиб, барча миллатлар билан яқиндан муносабатда бўлиш, улардаги фан-техника, ижтимоий ҳаётни ташкил қилишнинг самарали янгиликларини қабул қилиб олиш зарур. Ўз миллати учун жон куйдирувчи киши миллатининг ютуқ ва тарихий хизматларидан фахрланади, аммо ҳар қадамда унга танқидий кўз билан боқиб, доғларни тозалашга, нуқсонларни бартараф қилишга интилади, бу жараёнда фаол қатнашиб, шу орқали ўз миллатининг ривожланишини тезлаштиради. Миллий биқиқликка интилиш ўтган асрларда жаҳоннинг мустамлакалар ва метрополиялар, қолоқ ўлкалар ва илғор давлатлар, озод халқлар ва мустабидлик исканжасидаги халқларга бўлиниб кетиши шароитида ғоя ва амалиёт сифатида ривожланиб, умумижтимоий тараққиётнинг регрессив ҳолатини таъминлади. Миллий биқиқлик иллатига дучор бўлганлар демократик, маърифатпарвар ҳамда инсонпарвар кучлардан фарқли ўлароқ, ўз миллатининг манфаатларини бошқа миллатлар ҳақ-ҳуқуқларидан юқори қўйиб ҳал этишга интилувчилардир. Истибдод даврида ҳукмрон бўлган мафкура миллий биқиқлик ҳамда миллатчиликка қарши кураш ниқоби остида гегемонликка даъво қилувчи миллат вакилларининг айримларида миллий биқиқлик хусусиятларини ривожлантирди, ушбу жиҳат ижтимоий-маданий ҳаётимизга ёт бўлган маънавий-маданий таъсирлар хуружини кучайтирди. Ушбу жиҳатларни миллий тил ва маданиятимизнинг камситилганини, урф-одат ва анъаналар эскилик сарқити сифатида четга суриб қўйилгани, динга афъюн сифатида қаралиб, жамият аъзолари қалбидан юлиб ташлаш учун қилинган ҳаракатларда намоён бўлди. Миллий биқиқликка интилиш жамиятда ўз миллати ҳамда унинг имкониятларини юқори қўйиш ўтиш даври қарама-қаршиликлари шароитида кўзга ташланади. Умуммиллий тараққиётдаги ушбу масъулиятли паллада ўзаро тинчлик, тотувлик, миллий ва диний бағрикенгликни тарғиб этиш кўзланган мақсадга етиш йўлидаги энг самарали усулдир. Мустақил Ўзбекистоннинг гуллаб-яшнашини истайдиган ҳар бир фуқаро мамлакатимизнинг барча ривожланган давлатлар билан муносабатларининг ҳар томонлама кенгайиши ва чуқурлашиши юртимизда миллатлараро ҳамжиҳатликни янада мустаҳкамлашга хизмат қилмоғи лозим. Миллатларнинг ўзаро ҳамжиҳат фаолияти кенгайиб бораётгани, миллатпарварлик ғоялари ўз ўрнини топаётгани жамиятимизда ижтимоий ҳамкорлик янада кучайиб бораётганини англатади.