Мерос – ижтимоий, иқтисодий, маънавий ва ҳуқуқий жиҳатдан хилма-хил мазмунга эга бўлган сермаъно тушунча:

1) ижтимоий маънода, аждодлардан авлодларга ворисийлик асосида ўтиб келаётган, инсоният томонидан ўтмишда яратилган барча моддий ва маънавий бойликларни ифодалайди. Улар оғзаки ва ёзма шаклларда ҳамда ўтмишда яратилган ва бугунги кунда ҳам ўз мавқеини, қадрини сақлаб қолган ҳамда сақланиб келаётган осори-атиқалар, барча моддий ва маънавий ҳаётда эришилган ютуқлар; билим ва кўникмалар, тажрибаларни билдиради. Мерос мансублилигига кўра алоҳида шахс, оила, гуруҳ, жамоа, ҳудуд, миллат, давлат, умуминсоний даражаларга бўлиниши мумкин. Мерос маданий, тарихий, моддий ва маънавий турларга ҳам ажратилади. Бу турлар ҳам ўз навбатида алоҳида қисмларга эга бўлиб, масалан, маданий мерос объектив ва индивидуал, анъанавий ва замонавий кўринишларда намоён бўлади;

2) ҳуқуқий маънода, фуқаронинг вафот этиши ёки унинг вафоти суд-ҳуқуқ органлари томонидан қайд қилиниши билан унинг ворисларига бериладиган мол-мулкни англатади.