Жинсий бузуқликлар – инсоннинг жинсий ҳиссиётлари ва хатти-ҳаракатлари билан боғлиқ маънавий бузилишнинг намоён бўлиш шакллари. Одатда, ҳар қандай жинсий хулқ меъёрининг бузилиши жинсий бузуқликлар сифатида тушунилади. Афсуски, дунёнинг баъзи мамлакатларида жинсий бузуқликларнинг айрим шакллари ҳаёт тарзининг таркибий қисмига айланиб бормоқда, ҳаётда уларнинг содир бўлишига одатий ҳол сифатида қараш таомилга кирмоқда. Баъзи ҳолларда бу масаланинг фақат соғлиқ ва тиббиёт билан боғлиқ жиҳатига эътибор қаратилади. Замонавий тиббиёт нуқтаи назаридан, тиббий аралашувга муҳтож ва даволаниши зарур. Жинсий бузуқликлар дейилганида, инсоннинг жамият аъзоси эканига, унинг меҳнат фаолиятига, одатий ижтимоий фаоллиги ҳамда атрофдагиларга бўлган муносабатига ҳалақит берадиган ҳолат тушунилади. Одатда, икки хил жинсий оғишлар фарқланади: тиббий жинсий аралашувни зарур деб топувчи парафилиялар ва саломатлик чегарасидан чиқмайдиган ҳолатлар кўринишлари.

Жинсий оғишларни касаллик сифатида талқин этишда қуйидаги тамойиллар асос қилиб олинади ва уларни даволаш лозим деб топилади:

а) камида олти ой давомида жинсий бузуқликлар билан боғлиқ кечинмаларнинг шахс руҳиятида такрорланиб туриши;

б) жинсий хулқ ёки жинсий фантазиялар беморга азоб келтирса, унинг ижтимоий нуфузига путур етказса (ишдан бўшатиш, ижтимоий нобоп хулқи учун жазо олиш ва шу кабилар);

в) бузуқликнинг бирламчи сабаби алькогол ёки гиёҳли модданинг истеъмол қилиниши бўлса;

г) ўз хулқини назорат қила олмаслик натижасида жинсий бузуқликларга оид ҳаракатлар содир этилса.

Агар санаб ўтилган белгилар учрамаса, у ҳолда «парафилия» ташҳиси қўйилмайди. Ижтимоий меъёрдан оғувчи жинсий хулқ шакли субъектнинг ижтимоий нуфузига таъсир этмаса, тиббий аралашув шарт эмас, деб топилади. Бу масаланинг чуқур ижтимоий, маънавий жиҳати ва оқибатлари ҳам бор. Чунки жинсий бузуқликлар фақат жинсий майл натижаси, беозор табиий ҳодиса эмас, балки инсон маънавиятига, ахлоқийлик талабларига тўғри келмайдиган ижтимоий бузилишдир. Қолаверса, бу ҳодиса фақат олисдаги мамлакатларга хос, деган тасаввурлар билан хотиржамликка берилиш ярамайди. Уларнинг таъсирига қарши курашиш, аҳоли, айниқса, ёшлар қалби ва онгига юксак маънавият тамойилларини сингдиришга алоҳида эътибор бериш лозим. Бу эса маънавий тарбия соҳасида барчамизнинг масъул эканимизни, мазкур соҳадаги вазифаларни бажаришда фаол бўлишимиз зарурлигини англатади.