Жараён – воқеа ва ҳодисалар ривожидаги узлуксизликни, табиат, жамият ва инсоният ҳаётидаги муттасил ва доимий ҳаракатни ифодаловчи тушунча. Жараён ижтимоий, иқтисодий, сиёсий, маданий, маънавий, илмий ва бошқа соҳаларда намоён бўлиши мумкин. Миқёсига кўра умумбашарий, минтақавий ва миллий аҳамиятга молик жараёнлар бир-биридан фарқланади. Ижтимоий жараёнлар, одатда, уларни белгиловчи омиллар ва манбаларга нисбатан сабаб ва оқибат сифатида намоён бўлади. Демак, ҳар қандай жараён, шу жумладан, ижтимоий жараёнлар зоҳирий ва ботиний асосларга эга бўлиб, улар айни чоғда сабаб ва оқибат, зарурият ва тасодифият тушунчаларида ўз ифодасини топадиган муносабатларни англатади. Ижтимоий тараққиётнинг таркибий қисми бўлган жараёнлар жамият кайфиятига таъсири нуқтаи назаридан салбий ва ижобий тарзда намоён бўлиши мумкин. Жараён инсон омилининг кучи ва қудратига боғлиқ. Уларни бошқариш, мақсад сари йўналтириш муҳим аҳамиятга эгадир.