Жамиятни ахборотлаштириш – жамият ҳаётининг барча соҳаларида ахборот ресурсларини фаол шакллантириш ва улардан кенг миқёсда фойдаланиш жараёнини ифодалайдиган тушунча. Жамиятни ахборотлаштириш жараёнида ишлаб чиқаришнинг одатдаги технологик усули ва турмуш тарзи ахборот воситалари ва усулларидан фойдаланишга асосланадиган янгича (постиндустриал) шакл-шамойил ва мазмун-моҳият касб этади. Ахборотлашган жамият концепциясига кўра, жамиятни ахборотлаштириш цивилизация ривожланишининг янги тарихий босқичи бўлиб, унда ахборот ва билим ишлаб чиқаришнинг энг асосий маҳсулларидан бири ҳисобланади.

Ахборотлашган жамиятнинг ўзига хос хусусиятлари: а) жамият ҳаётида ахборот ва билимлар ролининг ортиши; б) ялпи ички маҳсулотда ахборот коммуникациялари, маҳсуллари ва хизматлари улушининг кўпайиши; в) глобал ахборот майдонининг яратилиши. Бу эса, ўз навбатида, одамларнинг самарали информацион ўзаро алоқа қилишини, жаҳон ахборот ресурсларидан баҳраманд бўлишини ҳамда уларнинг ахборот маҳсуллари ва хизматларига бўлган эҳтиёжлари қондирилишини тақозо қилади.