Абул Ғозихоннинг “Шажарайи турк” асари янги нусхаси топилди. Бу ҳақда Шарқшунослик институти катта илмий ходими, тарих фанлари бўйича фалсафа доктори Ҳилола Назирова oyina.uz порталига маълум қилди.

“Шажарайи турк”да Хоразмнинг XVI–XVII аср биринчи ярмидаги ижтимоий-сиёсий ҳаёти баён этилган. Марказий Осиё тарихининг европача тасаввури айнан шу асар орқали шаклланган ва тадқиқотчиларга икки асрдан зиёд асосий манба бўлиб хизмат қилган.

Дунё бўйлаб каталогларда асарнинг 22 та қўлёзмаси қайд қилинган, шулардан 5 таси ЎзР ФА Абу Райҳон Беруний номидаги Шарқшунослик институтида сақланади. Яқинда эса “Шажарийи турк”нинг яна бир тўлиқ матнли нусхаси топилди. Манбашуносликда “Гурлан нусхаси” номи билан қайд этилиб, илмий муомалага киритилади. Қўлёзма колофонида 1317 ҳижрий йили (1899-1900) кўчирилгани ёзилган.

– “O‘zbekiston tarixi” телеканалидаги “Javohir” кўрсатувида Абул Ғозихон асари хусусида мулоҳазаларимизни билдирган эдик. Кўрсатувни кўрган гурланлик Матюсуф Салимов “Шажарайи турк”нинг саноқли нусхалари сақланиб қолганидан ҳайратланади (мамлакатимизда юзлаб нусхалари бўлса керак, деб ўйлаб юрар экан) ва ота-боболаридан мерос қўлёзма ноёб манба бўлиши мумкинлигини англайди. У киши биз билан телефон орқали боғлангач, тезда Гурланга етиб бордик. Сафарда бизга ҳамроҳлик қилган, яқиндан кўмак берган Дилдора Рўзметова, Озод Саидовга алоҳида ташаккур билдирамиз, – дейди  тарих фанлари бўйича фалсафа доктори Ҳилола Назирова.

“Шажарайи турк” асарининг Гурлан нусхаси матни тўлиқ, чиройли насталиқ хатида кўчирилган. Матн атрофи қизил рангли ҳошия чизиғи билан ўралган. Қўлёзма манбанинг тадқиқи энди бошланди. Олима илмий изланиш натижаларини яқин орада жамоатчиликка батафсил етказилишини маълум қилган. Ўз навбатида, мазкур қимматли топилдиқни тақдим қилгани учун қўлёзма эгаси, гурланлик Матюсуф Салимовга чуқур миннатдорлик билдиради.

Тўлиқ мақола билан ушбу ҳавола орқали танишишингиз мумкин.