9 май – Хотира ва қадрлаш куни муносабати билан “Oyina.uz” портали томонидан “Қисқа ҳикоялар” танлови эълон қилинган эди.

Портал ботига икки юздан зиёд ижодий ишлар келиб тушди. Айтиш керакки, аксарият иштирокчилар қисқа ҳикоя ўрнига иншо, қатра, шеър, баён ҳамда катта ҳажмдаги ҳикоялар йўллаган. Кўпгина материаллар мазмунан савияли бўлса-да, аммо жанр жиҳатидан мос эмас деб топилди. Аввало, қисқа ҳикоя ўз номига яраша ихчам ва лўнда ёзилиши, кутилмаган ечимга эга бўлиши лозим.

Танловга юртимизнинг барча вилоятлари ва қўшни республикадан ҳам ижодий ишлар келиб тушди. Бошланғич синф ўқувчилари, ижодий-маданий масалалар бўйича тарғиботчилар, адабиёт ўқитувчилари фаоллик кўрсатишди. Шунингдек, русийзабон қаламкашлар ҳам қатнашди.

Ҳакамлар ҳайъатининг якуний хулосасига кўра, танловда қуйидаги қисқа ҳикоялар ғолиб деб топилди.

1-ўрин – “Ёзиқ”, Қўчқор Норқобил

2-ўрин – “Оғриқли хотира”, Мастура Бўриева

3-ўрин – “Куйиклар”. Нилуфар Обидова

Ғолиблар диплом ва эсдалик совғалари билан тақдирланади. Уларнинг қисқа ҳикоялари порталда эълон қилинади. Бошқа муаллифларнинг талабга жавоб берадиган ижодий ишлари ҳам “Oyina.uz”да бериб борилади.