Шавкат Мирзиёев Қозоғистонда содир бўлган йирик ўрмон ёнғинлари муносабати билан таъзия йўллади. Бу ҳақда Президент матбуот котиби хабар бермоқда.

Давлат раҳбари Абай вилоятида содир бўлган йирик ўрмон ёнғинлари оқибатида инсонлар ҳалок бўлгани ва катта зиён кўрилгани муносабати билан президент Қосим-Жомарт Тўқаевга ва қардош Қозоғистон халқига таъзия йўллаган.

“Шавкат Мирзиёев қурбон бўлганларнинг оила аъзолари ва яқинларига чуқур ҳамдардлик билдирди”, — дейилади хабарда.

Аввалроқ Қозоғистоннинг Абай вилоятида содир бўлган ўрмон ёнғинида 14 киши ҳалок бўлгани ва 12 июнь куни мамлакатда умуммиллий мотам куни деб эълон қилингани ҳақида хабар берилганди.