Туркиянинг Каҳраманмараш вилоятида рўй берган зилзила оқибатида бедарак йўқолган Ўзбекистон фуқароси Бойбеков Рашид Анвар ўғли топилди. Бу ҳақда Ўзбекистон Республикасининг Туркиядаги элчихонаси хабар берди.

Қутқарувчилар томонидан вайроналар остидан олиб чиқилган ватандошимиз ҳозирда шифохонага жойлаштирилган ва илк ёрдам кўрсатилмоқда.

Аввалроқ Туркиядаги зилзилада бир ўзбекистонлик ҳалок бўлгани, тўрт ҳамюртимиз бедарак йўқолгани хабар қилинганди. Кейинчалик Ўзбекистоннинг Истанбул шаҳридаги Бош консулхонаси улардан икки нафари билан алоқа ўрнатилганини маълум қилди.