Шу кунларда келажак авлод тинчлиги йўлида қурбон бўлганлар хотирланмоқда. Иккинчи жаҳон уруши қатнашчилари, фахрийлар ҳолидан хабар олинмоқда. Шу тариқа мозийга назар солиниб, тинчлик неъмати улуғланаётир. Айниқса, уруш қатнашчиларига кўрсатилаётган эътибордан бутун халқимиз хурсанд бўлмоқда ва миннатдорлик билан эътироф этмоқда. Лекин яқин беш-ўн йилдан буён мамлакатимизда 9 май арафасида айрим “кўзга кўринмас кучлар” томонидан Георгий лентасини тарқатиш ҳолатлари кўзга ташланмоқда. Аввал катталар орасида кузатилган бу ҳаракатнинг эндиликда боғча болалари орасида ҳам ёйилаётгани кишини ҳушёр тортиради. Айрим фуқароларимиз, тарбиячиларимиз бу лентанинг асл маъносидан бехабар бўлиб, ўзларининг хатти-ҳаракатини Иккинчи жаҳон урушидаги ғалаба билан боғлашга ҳаракат қилишмоқда.

Хўш, Георгий лентаси нимани англатади? Унинг иккинчи жаҳон уруши ва ғалабага қандай боғлиқлиги бор? Аввало, шуни айтиш керакки, Георгий лентаси уч қатор қора ва икки қатор тўқ сариқ йўлли боғич бўлиб, ушбу ранглар қандай маъно ташиши ҳақида турли қарашлар мавжуд. Тарихдан яхши биламизки, Екатерина II 1769 йилнинг 26 ноябрида рус-турк уруши даврида авлиё Георгий ордени ва тасмасини жорий этади. Орден ва тасма билан илк бор шу урушда жасорат кўрсатган офицер ва аскарлар тақдирланган. Ушбу боғич билан безатилган орден тақиш одати чор Россиясининг Туркистон ўлкасига босқинчилик юришлари даврида бошқача маъно касб этади. Қўқон хонлиги, Хива хонлиги ва Бухоро амирлигини ғорат қилган босқинчи зобитлар ва генераллар учун махсус – “Қўқон хонлигини забт этгани учун”, “Марказий Осиёга юриши учун”, “Хива хонлигига юриши учун” каби медаллар таъсис этилади. Медаль ва уни илон каби чирмаб турган Георгий лентаси мардлик ва жасорат кўрсатилгани учун эмас, аксинча, айнан босқинчилик қилгани, бизнинг Она Ватанимизни қонга ботиргани, обод маскан ва манзилларимизни култепага айлантиргани, мард боболаримизни ўлдиргани учун босқинчи ҳарбийларга берилган.

Ўзбек халқининг бошига балолар ёғдирган, чексиз офат, аччиқ кулфат, оғир мусибат келтирган чор ҳарбийларининг бундай “қаҳрамон”лари ўзининг ҳукумати томонидан Георгий тасмаси ила чирмалган орденлар билан мукофотланган. Бугун “Ғалаба” боғига олиб келинган ўнлаб боғча ёшдаги жажжи фарзандларимизнинг кўкракларига мана шундай боғичларнинг тақиб қўйилгани қалбимизни безовта қилди. Бундай акциялар замирида қандай сиёсий мақсадлар яширинган? Нега энди бизнинг фарзандларимиз бу машъум лентани тақиб юриши керак? Ёш болаларнинг кўксига Георгий тасмаларини қадаб, оммавий тадбирларга жалб қилиш ҳолатини таълим ва тарбияга масъул идоралар қандай изоҳлайди?

Республика Маънавият ва маърифат маркази

Матбуот хизмати