Меҳмонимиз билан бирга бозорга чиқишга тўғри келди. Анча вақт бозор айландик. Дўконма-дўкон пишириқлар, бошқа нарсалар сотиб юрганлардан тортиб, дўкондорларгача, ёймачиларгача, ҳаммага ишида, тириклигида ёрдам бераётган, бир-бирини тушунишга ва зарур товарни топишга имкон бераётган тилимиз...

“Мана марожний, холодилникдан олинган. Опқолинг, опа!”

“Фруктовий кампотлар. Олчали, смородинали, персикли. Қанақасидан берай?”

“Келинг, женский керакми сизга? Бу ёқда летний кўйлаклар. Янги келди, Бишкек, качественний…”

“Классический керакми ё вечернийми. Ана шу синий свети, кейин коричневийси сизга тушади. Примерка қилиб кўрасизми?”

“Перашкалар, қайноқ, оп қолилар!”

“Кенайи, биз фақат оптом сотамиз”.

“Шу фиолетовийни айтяпсизми? Олдинги сезондан остатка. Дешовкамас, олинг, арзон бервораман”.

“Женский, мужский, детский наскилар. Опкетинг, арзон. Летний юпқалари келган”.

“Сизга франсузкий длиной кўйлаклар ярашади. Кўринг, мана бу воротниклиларини. Оптом олсангиз, уступка қиламиз”.

“Пояс билан кийсангиз ҳам бўлади, пояссиз ҳам”.

“Босоножка керакми сизга? Подоши қанақа бўлсин?”

“Ҳозир скидка вақти. Иккаласини олинг”.

Тилимизни ҳакка чўқиганми? Аҳвол оғир, ҳатто жуда оғир... Бу аҳволдан қандай чиқамиз? Шу халқ эмасмиди – бу бебаҳо хазинани – тилимизни яратган?

Тилни халқ сақлаб қолмаса, уни авлодларга бутун ҳолида етказиб бермасак, келажак олдида жавоб бермаймизми?

Бир йилда 10 минглаб китоб чиқса ҳам кўп эмас. Қачондир китобга ёппасига қайтамиз ва ўшанда тилимизни ҳам сақлаб қоламиз.

Сизнингча, тилни халқимизга қайтаришнинг қандайдир йўли борми?

Маъмура ЗОҲИДОВА