Buxoro shahridagi sobiq «Buxoroteks» fabrikasiga qarashli inshootlardan birining oʻrnida zamonaviy qiyofada barpo qilingan ijtimoiy yotoqxona foydalanishga topshirildi.

Qayd etilishicha, Sanoatchilar koʻchasida joylashgan uch qavatdan iborat inshoot shu kunga qadar abgor holda boʻlgan. 

«Loyiha davlat byudjeti hisobidan 6 milliard 320 million soʻmga moliyalashtirildi. Ijtimoiy yotoqxona 440 oʻringa moʻljallangan boʻlib, 100 xonadan iborat. 

 

Mukammal taʼmirdan chiqarilgan inshoot bugunga kelib umumiy qiymati 2 milliard soʻmga yaqin sarmoya evaziga zarur inventarlar bilan jihozlandi. Unda maʼrifat va maʼnaviyat xonasi, shinam oshxona, shuningdek, sanitariya-gigiyena tarmogʻi ham bor. Bunda zarur infratuzilma — tabiiy gaz, elektr energiyasi, toza ichimlik suvi shay holatga keltirilgan», deyiladi xabarda.