Bugun, 18-avgust kuni Oʻzbekistonda tush payti magnit boʻronining G4 darajaga ega 6 balli oʻta faol bosqichi kuzatiladi. Bu haqida Gidrometeorolog, iqlimshunos Elbek Abdulahatov maʼlum qilgan.

Qayd etilishicha, bugun hamda ertaga, 19-avgust kuni Oʻzbekistonda magnit boʻronining oʻta faol bocqichi kuzatiladi. 

Bugun kun davomida G3 va G4 darajaga ega 5-6 balli magnit boʻronlari boʻlishi prognoz qilinmoqda. 

G4 darajali magnit boʻroni yuqoriroq taʼsir kuchiga ega boʻlib, 6 balli magnit maydon geomagnit poʻrtana (shtorm) kuchiga ega. Bu kuch aloqa, elektr tarmoqlari, navigatsiya tizimi, sunʼiy yoʻldoshlar parvozi, quvur va trubalardagi induksiya oqimi, geologik qidiruv ishlari hamda inson salomatligiga taʼsir koʻrsatishi mumkin. 

Maʼlumot oʻrnida, bugun kun davomida juda ham koʻpchilikda bosh orqa qismida karaxtlik va biroz koʻngil aynish holatlari kuzatilishi mumkin.