Toshkent shahar hokimligida poytaxt hokimi Jahongir Ortiqxoʻjayev va mutaxassislar ishtirokida Yaponiya biznes delegatsiyasi bilan uchrashuv boʻlib oʻtdi.

Yaponiya delegatsiyasining GIC holding direktori Xattori Ay poytaxtimizdagi yirik biznes-markazi hududida yapon restoranini tashkil qilishga qiziqish bildirdi.

Yaponiyalik tadbirkorlar yapon va oʻzbek madaniyatlari yaqinligini taʼkidlab, kichik ovqatlanish nuqtalari, yapon mahsulotlari va esdalik sovgʻalar doʻkonlari joylashgan alohida koʻchani tashkil qilishni koʻzda tutuvchi Japanese Street loyihasini amalga oshirish taklifini bildirdilar. Mehmonlarning aytishicha, bu koʻcha qoʻshma koʻrgazmalar, yarmarka va festivallar oʻtkazish uchun ajoyib manzilga aylanadi va, shubhasizki, poytaxtning turistik jozibadorligini oshiradi.