20-21-iyul kunlari Issiqkoʻl viloyatining Choʻlponota shahrida Markaziy Osiyo davlatlari rahbarlarining maslahat uchrashuvi boʻlib oʻtadi.

Bu haqda Qirgʻiziston prezidenti maʼmuriyati tashqi siyosat boʻlimi mudiri Muratbek Azimbakiyev maʼlum qildi.

Uchrashuvda Oʻzbekiston prezidenti Shavkat Mirziyoyev, Qirgʻiziston prezidenti Sadir Japarov, Qozogʻiston prezidenti Qosim-Joʻmart Toʻqayev, Tojikiston prezidenti Imomali Rahmon va Turkmaniston prezidenti Serdar Berdimuhamedov ishtirok etadi. 

“Mamlakatlar rahbarlari mintaqaviy xavfsizlikka chaqiriq va tahdidlarga birgalikda javob berishda Markaziy Osiyo davlatlarining oʻzaro hamkorligini kuchaytirish yuzasidan fikr almashadilar, mintaqa davlatlarining barqaror iqtisodiy oʻsishini taʼminlash maqsadida hamkorlikni kengaytirish istiqbollarini muhokama qiladilar, shuningdek, Markaziy Osiyo davlatlari oʻrtasidagi madaniy-gumanitar hamkorlikni yanada mustahkamlash masalalari koʻrib chiqiladi”, - dedi Azimbakiyev.