Navoiy viloyatida faoliyat yurituvchi telejurnalist Ruxsora Karimova YTH oqibatida vafot etdi. Bu haqda Facebookʻda uning hamkasblari maʼlum qilgan.

Facebook foydalanuvchisi Xushnud Hotamning yozishicha, Ruxsora Karimova Navoiy viloyati teleradiokompaniyasining eng iqtidorli, isteʼdodli muharrirlaridan biri boʻlgan. U avtohalokatga uchrab, vafot etgan. Aytilishicha, marhumadan uch nafar farzand qolgan.

Aniqlashtirishicha, Ruxsora Karimova ish yuzasidan Toshkent shahriga kelayotganda YTHga uchragan. Ammo YTH tafsilotlari hozircha nomaʼlum.

“Oʻzimiz ham shokdamiz. Eng mahoratli va inson sifatida ham samimiy hamkasblarimizdan biri edi”, — deydi AOKAning viloyat boshqarmasi boshligʻi Dilshod Mamarajabov.