Poytaxtimizda soʻlim goʻshalar soni yana bittaga koʻpaydi. Afrosiyob koʻchasida “Kosmonavtlar sayilgohi” barpo etildi. U yerda ichki ishlar organlarining kitobxon oilasi tasvirlangan haykal oʻrnatildi.

Ushbu yodgorlik majmuasining ochilish marosimi boʻlib oʻtdi. Unda ichki ishlar organlari xodimlari, Respublika Maʼnaviyat va maʼrifat markazi rahbari Minhojiddin Hojimatov, Qoraqalpogʻiston xalq shoiri, Oʻzbekistonda xizmat koʻrsatgan madaniyat xodimi Rustam Musurmon, Alisher Navoiy nomidagi Oʻzbekiston Milliy kutubxonasi direktori oʻrinbosari Nasiba Xoldorova va boshqalar qatnashdi. 

Haykalning mazkur bogʻda oʻrnatilishidan asosiy maqsad nafaqat ichki ishlar xodimlari, balki Toshkent ahli va mehmonlari, ayniqsa, yoshlar orasida kitobxonlik madaniyatini yuksaltirish, ular orasida kitobxonlikni keng targʻib qilishdan iborat. 

Mazkur ijod namunasi Oʻzbekiston Badiiy akademiyasining isteʼdodli haykaltaroshlari tomonidan ishlangan.