Ijtimoiy tarmoqda tarqalgan videolar oʻrganilib, qoidabuzar avtobus haydovchilariga chora koʻrildi.

Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Toshkent shahrida qoidalarni qoʻpol ravishda buzib harakatlangan ikki avtobus haydovchilariga chora koʻrilgani haqida maʼlumot berdi.

Ijtimoiy tarmoqda Isuzu avtobusi haydovchisi transport vositalarining oqimiga qarama-qarshi tarzda harakatlanganligi hamda SAZ LE60 rusumli avtobus haydovchisi svetoforning taqiqlovchi qizil chirogʻida harakatlanganligi aks etgan videolar tarqaldi.

Videolar Toshkent shahar IIBB JXX YHXB xodimlari tomonidan oʻrganilib, ushbu Isuzu hamda SAZ LE60 avtobus haydovchilariga nisbatan belgilangan tartibda maʼmuriy bayonnomalar rasmiylashtirilgan.