“Oʻzgidromet” xizmati 29-iyundan 3-iyulgacha togʻli hududlarda glyatsial sel-suv toshqin hodisalari kelishidan ogohlantirdi.

Maʼlum qilinishicha, togʻlarda kutilayotgan yuqori harorat foni hisobiga Qirgʻizistondan Fargʻona viloyati togʻoldi va togʻli hududlari boʻyicha: Soʻx, Shohimardon, Isfayramsoy daryolarida glyatsial (muz aralash) sel-suv toshqin hodisalari yuzaga kelishi mumkin.

Markaz togʻoldi va togʻli hududlarda istiqomat qiluvchi fuqarolarni, dam oluvchilarni hamda togʻli hududlarda harakatlanuvchi haydovchilarni ehtiyotkorlik choralarini koʻrishga chaqirgan.