Samarqand viloyati Bulungʻur tumanida soxta ichki ishlar xodimasi qoʻlga olindi. Bu haqda viloyat Ichki ishlar boshqarmasi xabar qildi.

Qayd etilishicha, patrullik tekshiruv tadbirlari davomida tumanning “Mehrjon” mahallasi hududida fuqaro I.N. ichki ishlar organlari xodimlarining kiyimida (yengi kalta koʻk koʻylak, shim, bosh kiyimsiz va pogonlarsiz) yurgani aniqlangan.

Oʻtkazilgan suhbat davomida maʼlum boʻlishicha, ayol formani Samarqand shahrida joylashgan chevarxonalardan sotib olgan.

Holat yuzasidan tergovga qadar tekshiruv harakatlari olib borilmoqda.