Prezident Shavkat Mirziyoyev raisligida videoselektor yigʻilishi boʻlib oʻtmoqda.

Yigʻilishda Oliy taʼlim vazirligiga ayrim taʼlim yoʻnalishlarini oliygohdan texnikumga berish lozimligi koʻrsatib oʻtildi.

Misol uchun, Iqtisodiyot universitetida turizm menejmenti, reklama ishi, mehnat muhofazasi, Transport universiteti va Andijon mashinasozlik institutidagi avtomobil servisi yoʻnalishlarini texnikumlarga oʻtkazish boʻyicha yetarli baza mavjud. Bunday kasblar oʻnlab topiladi.

Shu bois, texnikumlari mavjud 62 ta oliygoh rektorlariga:

- oliygohlarda oʻqitilayotgan kamida 60 ta yoʻnalishni texnikumlarga oʻtkazish;

- texnikumlarni oʻtkaziladigan taʼlim yoʻnalishlari boʻyicha oʻquv dasturlari va darsliklar bilan taʼminlash;

- texnikumlarda oʻzining kafedralari filiallari va oʻquv laboratoriyalarini tashkil etish topshirildi.

Kelgusi yil 1-yanvardan boshlab ilmiy darajasi bor texnikum oʻqituvchilarining ish haqi oliygoh oʻqituvchilarinikiga tenglashtiriladi.