Prezident Shavkat Mirziyoyev raisligida aholini kasb-hunarga oʻqitish va monomarkazlar faoliyatini takomillashtirish chora-tadbirlari yuzasidan videoselektor yigʻilishi boʻlib oʻtmoqda.

Yigʻilishda 330 ta kasb-hunar maktabi, 173 ta kollej va 207 ta texnikum iborat tizim samarali ishlatilmayotgani qayd etildi. Ular mavjud quvvatlarining atigi 40-50 foizidan foydalanmoqda.


Energetika, Suv xoʻjaligi, Uy-joy kommunal vazirliklariga berilgan kollejlar 20 foiz, Qurilish, Transport vazirliklari kollejlari 10 foiz quvvatda ishlayapti.


Joriy yilda kollej va texnikumlarning 15 mingga yaqin oʻquvchilari kontrakt pulini toʻlash imkoniyati yoʻqligi bois, oʻqishni davom ettira olmagan.


Eng muhimi – kollej va texnikumlardagi kasblar ish beruvchilar talabiga mos emas. Oqibatda ular ishga olgan yoshlarni qaytadan oʻqitishga majbur boʻlmoqda.


Oʻquv dasturlari zamon talablaridan ancha orqada, 1 ming 350 nomdagi kasbiy darslik va adabiyotlar yetishmaydi.


Bu muammolar yechimi bilan shugʻullanadigan mutasaddi vazirliklar tizimli ishlamayotgani tanqid qilindi.


Shu bois kasb-hunar taʼlimini zamon talablariga moslashtirish boʻyicha yangi tizim joriy qilinishi belgilandi.