Xalq taʼlimi vazirligiga oʻqituvchilar tomonidan ayrim hududlarda mehnat taʼtili toʻlovi kechikayotganligi va kamaytirib toʻlash holatlari yuzasidan murojaatlar kelib tushmoqda. Bu haqda vazirlikning axborot xizmati quyidagilarni maʼlum qildi.

2022-yilda pedagog xodimlarga Oʻzbekiston Respublikasi Mehnat kodeksiga muvofiq yillik mehnat taʼtili berilib, bir yil davomida toʻliq ishlagan oʻqituvchilarga 48 kun hisobidan toʻliq mehnat taʼtili pullari toʻlab beriladi.

Ishga kirganiga bir yil boʻlmagan oʻqituvchilarga esa mehnat taʼtili puli ularning ishlagan davriga mutanosib ravishda toʻlanadi (Bunda mehnat taʼtili davri 48 kundan iborat boʻladi).

Shuningdek, bugungi kunda “UzASBO” dasturiy majmuasida mehnat taʼtili toʻlovlarini amalga oshirishda kuzatilgan texnik nosozliklar tezkor ravishda tegishli vazirliklar bilan hamkorlikda bartaraf etilib, ushbu toʻlovlarni amalga oshirish imkoniyati qayta tiklandi.

Taʼkidlanishicha, 15-iyundan boshlab maktab xodimlariga mehnat taʼtili toʻlovlari toʻlab boriladi.

Xabarda mehnat taʼtili toʻlovlarini amalga oshirishda muammo va tushunmovchiliklar yuzaga kelganda vazirlikning 71 202-09-09 Ishonch telefonlariga murojaat qilishlari soʻralgan.