Shu yilning 24-mayday 25-mayga oʻtar kechasi soat 00:40 larda “Qashqadaryo-Toshkent” yoʻnalishida harakatlanib kelgan “Lacetti” rusumli avtomashinasi YPX maskanida toʻxtatildi. Bu haqida Qashqadaryo viloyati IIB xabar berdi.

Unga koʻra, yukxona koʻzdan kechirilganda haydovchi Chiroqchi tumanida yashovchi S.B. boshqaruvidagi “Lacetti” rusumli avtomashinada tegishli veterinariya maʼlumotnomalarisiz, kelib chiqishi nomaʼlum boʻlgan, taxminan 160 kg ogʻirlikdagi yirik mol goʻshtlarini olib ketayotgani aniqlandi.

Goʻsht mahsulotlari Qashqadaryo viloyat oziq-ovqat mahsulotlari xavfsizligi mikrobiologiya va veterinariya-sanitariya ekspertiza laboratoriyasida tekshirib koʻrilganda isteʼmolga yaroqsizligi maʼlum boʻldi.

Viloyat hayvonlar kasalliklar tashxisi va oziq-ovqat mahsulotlari xavfsizligi davlat markazi kuydirish pechida 160 kg goʻsht mahsuloti yoʻq qilindi.