Bugun, 25 may kuni respublikadagi barcha umumiy o‘rta ta’lim muassasalarida 2021-2022 o‘quv yili rasman yakunlanib, “So‘nggi qo‘ng‘iroq” sadolari jarangladi.

Shu bois, yurtimizdagi barcha maktablarda “So‘nggi qo‘ng‘iroq” munosabati bilan tadbirlar bo‘lib o‘tdi. Unda yil davomida namunali xulq va a’lo baholarga o‘qib, eng yuqori ko‘rsatkichlarga erishgan iqtidorli bitiruvchilar rag‘batlantirildi. 2021-2022 o‘quv yilida fan olimpiadalari, ko‘rik tanlov va sport musobaqalarida ishtirok etib, faxrli o‘rinlarni egallagan hamda ijodkor o‘qituvchilar faxriy yorliqlari bilan taqdirlandi.

Ushbu sana maktabni bitirayotgan har bir o‘quvchi uchun juda unutilmas va hayajonli lahzalarga boy bo‘ladi. Sababi aynan mana shu kuni barcha jonajon maktabi bilan xayrlashib, katta hayot sari qadam qo‘yadi. 11 yil davomida saboq olgan ustoz-murabbiylari, jonajon sinfdoshlari bilan xayrlashadi.

Eslatib o‘tamiz, joriy yilda yurtimizdagi 10 130 ta umumta’lim maktablarni 390 ming nafardan ortiq bitiruvchi tamomlamoqda.