Bugun ertalabki soat 06:23da Fargʻona viloyatidagi Quva savdo kompleksida yongʻin kelib chiqqan. Bu haqida Favqulodda vaziyatlar vazirligi axborot xizmati xabar berdi.

Qayd etilishicha, yongʻin natijasida taxminan 25 ta kiyim-kechak doʻkonining tomi, shifti va ichki qismi yonib ketgan.

«Yongʻin oʻchirish ekipajlari voqea joyiga soat 06:27da yetib borib, yongʻin 07:10da qurshab olinib, 07:37da oʻchirildi. Hodisa oqibatida fuqarolarning tan jarohati olish va halok boʻlish holatlari qayd etilmadi» deyiladi xabarda.

Taʼkidlanishicha, voqea joyiga viloyat hamda tuman FVBlari rahbar xodimlari va 11 ta yongʻin-qutqaruv ekipaji jalb etilgan. Hozirda yongʻin sababi va keltirilgan zarar miqdori aniqlanmoqda.