“O‘zbekiston Respublikasi xalq artisti Farrux Zokirov ijodini keng targ‘ib qilish hamda yosh avlodga munosib yetkazish to‘g‘risida”gi Prezident qarori qabul qilindi.

Qarorga muvofiq, Toshkent shahri Yashnobod tumanidagi 7-sonli bolalar musiqa va san’at maktabiga Farrux Zokirov nomi beriladi.

Shuningdek, maktabda “Yalla” nomidagi bolalar ansambli tashkil etiladi. Estrada yo‘nalishida ijrochilik mahorat maktablari “ustoz-shogird” an’analari asosida yo‘lga qo‘yiladi.

Mahorat maktablarida faoliyat yurituvchi ustoz-ijodkorlar davlat byudjeti hisobidan har oy rag‘batlantirib boriladi.

Bundan tashqari, Yoshlar ijodiy laboratoriyasi doirasida:

– hududlardan saralangan iqtidorli o‘quvchilar uchun maxsus guruhlar shakllantiriladi;

– ular yozgi ta’til davrida bepul estrada xonandaligi kurslarida tahsil oladi;

– zamonaviy ovoz yozish va tasvirga olish studiyasi tashkil etiladi;

– o‘quvchilar ijodi televideniye va xalqaro onlayn platformalarda namoyish etiladi.