Onasi ayiq qafasiga tashlab yuborgan qizcha va uning akasiga Toshkent hayvonot bogʻiga bir umr bepul kirish imkoniyati berildi. Bu haqida Toshkent hayvonot bogʻi matbuot xizmati xabar berdi.

Taʼkidlanishicha, hozirda 3 yashar qizchaning ahvoli yaxshi. U shifoxonada intensiv terapiya xonasiga oʻtkazilgan.

“Ayni damda qizaloq intensiv terapiya xonasida va uning holati turgʻun deb baholanmoqda. Dinamikada nazorat koʻrigi oʻtkazildi. Qizaloq kelajakda ushbu hodisa asoratlaridan aziyat chekmasligi uchun biz bor imkoniyatlarni ishga solyapmiz”, – deydi shifokor va tibbiyot fanlari nomzodi Sobir Nasimov.