Quvaytning Oʻzbekistondagi yangi elchisi etib Turki Xolid Hamad al-Mikrad tayinlandi. Bu haqda Tashqi ishlar vaziri Baxtiyor Saidov xabar berdi.

Vazir yangi elchining ishonch yorliqlari nusxalarini qabul qildi. Oʻzbekiston va Quvayt oʻrtasidagi koʻp qirrali hamkorlikni yanada rivojlantirish istiqbollari muhokama markazida boʻldi.

Tadbirda shuningdek, Prezident Shavkat Mirziyoyevning 2025-yil fevral oyida Quvaytga amalga oshirgan davlat tashrifi ikki tomonlama munosabatlarni yangi bosqichga olib chiqqani qayd etilib, koʻrfaz arab davlatlari hamkorlik kengashi hamda boshqa xalqaro va mintaqaviy tashkilotlar doirasidagi hamkorlikni kuchaytirish masalalari ham koʻrib chiqildi.