O‘zbekistonda ko‘kalamzorlashtirish ishlarida qatnashgan fuqaro va tadbirkorlarga maxsus maqom va mukofot berish reja qilinmoqda. Bu haqda Prezidentga taqdim qilingan ekologik tashabbuslar loyihasi chog‘ida ma’lum bo‘ldi.

100 tup daraxt ekkan yoki 10 mln so‘m xayriya qilganlarga “ekofaol fuqaro”, undan kattaroq hissa qo‘shganlarga esa “metsenat” maqomi va davlat mukofotlari berilishi reja qilinmoqda.

O‘zbekistonda “Yashil makon” umummilliy loyihasida ishtirok etayotgan fuqarolar va biznes vakillarini rag‘batlantirish tizimini joriy etiladi.

Ekologiya va iqlim o‘zgarishi milliy qo‘mitasi bo‘lim boshlig‘i Javohir Musayevning so‘zlariga ko‘ra, loyiha ishtirokchilari uchun ko‘kalamzorlashtirishga qo‘shgan hissasiga qarab maxsus maqomlar berish ko‘zda tutilgan.

“Misol uchun, 100 tup daraxt ekkan yoki „yashil“ xayriya jamg‘armasiga 10 mln so‘m xayriya qilgan fuqarolarga „ekofaol fuqaro“ maqomi beriladi”, dedi u.

1000 tup daraxt ekkan yoki jamg‘armaga tegishli miqdorda mablag‘ o‘tkazgan tadbirkorlarga esa “ekohamkor” maqomi beriladi.

Uning ta’kidlashicha, o‘z mablag‘lari hisobidan 5 mlrd so‘m xayriya qilgan yoki 5000 ga yaqin ko‘chat ekkan hamda bog‘lar tashkil etishda faol ishtirok etgan fuqarolarga “metsenat” maqomi beriladi.

Bundan tashqari, eng faol ishtirokchilar uchun davlat mukofoti ham ko‘zda tutilgan.

“Qoraqalpog‘iston Respublikasi, viloyatlar va Toshkent shahrida o‘z mablag‘lari hisobidan kamida beshta yashil bog‘ tashkil etishda faol ishtirok etgan fuqarolarni „Kelajak bunyodkori“ davlat mukofoti bilan taqdirlash ko‘zda tutilmoqda”, deya qo‘shimcha qildi qo‘mita vakili. Taqdimotda havo ifloslanishini kamaytirishga qaratilgan chora-tadbirlar ham namoyish etildi.