Bugun, 24 mart kuni O‘zbekistonda xizmat ko‘rsatgan artist Oysha Jo‘rayeva 79 yoshida, o‘zining tug‘ilgan kunida vafot etdi. Bu haqda nabirasi Gulsanam Abdulohunova xabar berdi. 

Taniqli o‘zbek aktrisasi 1947-yilning 24-martida Qirg‘izistonning Jalolobod viloyatida dunyoga kelgan va o‘z faoliyatini Qo‘qon teatrida boshlagan. Uning turmush o‘rtog‘i ham san’atkor bo‘lgan. Oysha Jo‘rayeva ijrosida yaratilgan aktrisalik obrazlari tabiiyligi bilan ajralib turadi. Shu orqali u tomoshabinlar qalbidan joy olgan. U o‘z faoliyati davomida “Meros”, “Jumboq”, “Toliqqan ko‘ngillar”, “Armonli dunyo”, “Burch”, “Jasur”, “Narigi sohilda qolgan bolalik”, “Suv yoqalab”, “Maysaraning ishi”, “Qabrdagi xazina” va boshqa filmlarda rol ijro etgan va xalqqa tanilgan.