Islom sivilizatsiyasi markazi dunyoning eng go‘zal muzeylari ro‘yxatiga kiritildi

Saqlash
16:24 / 02.03.2026 43 0

O‘zbekistondagi Islom sivilizatsiyasi markazi Prix Versailles talqiniga ko‘ra 2026-yilgi dunyodagi eng go‘zal muzeylari ro‘yxatidan joy oldi.

 

Xabarda aytilishicha, kecha, 28-fevral kuni markaz rahbariyati nomiga nufuzli xalqaro me’moriy mukofot — Prix Versailles tanlov qo‘mitasidan rasmiy maktub kelib tushgan.

 

Maktubda Islom sivilizatsiyasi markazi 2026-yil uchun dunyodagi eng go‘zal muzeylar global ro‘yxatiga kiritilgani ma’lum qilingan. 

 

Ma’lumot uchun, ushbu reyting innovatsionlik, kreativ yondashuv, milliy merosni aks ettirish hamda ekologik samaradorlik kabi qat’iy mezonlar asosida shakllantiriladi. 

 

Prix Versailles bosh kotibi Jerom Guaden o‘z maktubida mazkur saralash munosabati bilan samimiy tabriklar yo‘llab, markazning 2026-yilgi ro‘yxatda ishtirokini tasdiqlash bo‘yicha rasmiy yo‘riqnomani ham taqdim etgan.

 

Ta’kidlanishicha, markaz nafaqat 2026-yilning eng go‘zal muzeylari ro‘yxatiga kiritilgan, balki uchta oliy jahon unvonlaridan biriga da’vogarlik qilish huquqini ham qo‘lga kiritgan. Bular — Grand Prix Versailles, “Interyer” nominatsiyasi yoki “Eksteryer” nominatsiyalaridir. 

 

Jahon unvonlari sohiblarini tantanali e’lon qilish marosimi 2026-yil yakunida Parij shahridagi YUNESKO qarorgohida yoki Mukofot kotibiyati tomonidan belgilanadigan boshqa qabul qiluvchi shaharda o‘tkazilishi belgilangan.

 

Eslatib o‘tish lozim, O‘zbekistondagi Islom sivilizatsiyasi markazining ochilishi 2026-yil mart oyiga rejalashtirilgan.

Izoh yo‘q

Izoh qoldirish

//