2026-yilning 1-martidan boshlab yo‘l harakati qoidalarini buzganlik uchun YHXX Jamoat xavfsizlik departamenti tomonidan shakllantirilgan ma’muriy bayonnomalar, ya’ni jarima xatlarini pochta orqali yetkazish to‘xtatiladi. Bu haqda “O‘zbekiston pochtasi” AJ ma’lum qildi.

Unga ko‘ra, IIV “Xavfsiz shahar” tizimlarini rivojlantirish davlat muassasasi bilan 2026-yil uchun shartnoma imzolanmagani sababli mazkur xizmat to‘xtatiladi.

Axborot matnida “O‘zbekiston pochtasi” AJ ushbu masalaga doir yangi tafsilotlarni taqdim etib borishi qayd etilgan.

IIV masalaga munosabat bildirib, jarima xatlarini yetkazib berish to‘xtatilishini tasdiqlagan.

Unga ko‘ra, “Xavfsiz shahar“ konsepsiyasi doirasida qarorlarning ko‘chirma nusxasi va unga ilova qilingan materiallar sinov tariqasida quyidagi manbalar orqali yuborilishi yo‘lga qo‘yilgan:

1. davlat xizmatlari portali: my.gov.uz (MyGov mobil ilovasi);
2. SafeRoad mobil ilovasi;
3. Road24 mobil ilovasi;
4. Yagona interaktiv davlat xizmatlari mobil ilovasi (MIB).
5. Hamroh mobil ilovasi qaror rasmiylashtirilishi bilan 6079 raqamidan SMS-xabarnoma yuboriladi.

SMS-xabarnoma kelmagan taqdirda, my.gov.uz portaliga kirib, telefon raqamini ro‘yxatdan o‘tkazish kerakligi, shundan so‘ng barcha xabarnomalar avtomatik ravishda yuborilishi qayd etilgan.

Mazkur raqamli xizmatlardan foydalanish vaqti cheklanmagan, qo‘shimcha ro‘yxatdan o‘tish yoki hujjat taqdim etish talab etilmaydi, qaror rasmiylashtirilishi bilan bir vaqtda barcha materiallar bilan tanishish hamda qonunchilikda belgilangan muddatlarda jarimani to‘lash imkoniyati mavjud.