11-fevral kuni soat 9:00 dan boshlab, barcha hududlarda metan zapravkalar odatdagi ish rejimiga qaytmoqda. Bu haqda Energetika vazirligi xabar berdi.

Qayd etilishicha, vodiy viloyatlarida ham metan zapravkalar bosqichma-bosqich odatdagi rejimda faoliyat yurita boshlaydi.

Avvalroq vazirlik 2-fevraldan metan zapravkalar soat 10:00 dan 16:00 gacha faoliyat yuritishini aytib o‘tgandi.

Vazirlikka ko‘ra, Farg‘ona vodiysida metan zapravkalarning ish vaqti hokimliklar bilan kelishilgan holda, gaz bosimidan kelib chiqib belgilangan. Shuningdek, ijtimoiy soha obyektlariga xizmat ko‘rsatuvchi maxsus texnika va jamoat transportlari uchun gaz ta’minoti cheklovlarsiz, barqaror tarzda ta’minlanishi qayd etilgan.