Endi “layk” va “obunachilar yig‘ish” uchun qilingan huquqbuzarlik javobgarlikka sabab bo‘lishi mumkin.

Xabarga ko‘ra, ijtimoiy tarmoqlar orqali fuqarolarning sha’ni va qadr-qimmatini kamsitish, haqorat qilish, uyatli so‘zlar bilan so‘kish kabi mayda bezorilik holatlari uchun ma’muriy javobgarlik belgilash taklif etilmoqda.

Shuningdek, “layk” to‘plash, obunachilar sonini oshirish yoki turli kontent orqali e’tibor qozonish maqsadida huquqbuzarlik sodir etish, uni tasvirga olib internet tarmoqlarida tarqatish orqali qonun-qoidalarni mensimaslikni targ‘ib etganlik uchun ham ma’muriy jarima qo‘llash nazarda tutilmoqda.

Mazkur qonun loyihasi Oliy Majlis Qonunchilik palatasidagi siyosiy partiyalar fraksiyalarining yig‘ilishida birinchi o‘qishda muhokama qilingan.