Ijtimoiy tarmoqlarda Samarqand viloyati, Payariq tumanida joylashgan “Choshtepa-2” arxeologiya yodgorligi hududida og‘ir texnika vositalari yordamida noqonuniy buzilish holatlariga olib borilayotgani yuzasidan xabarlar tarqaldi.

Madaniy meros agentligi bergan rasmiy munosabatga ko‘ra, 24-yanvar kuni Samarqand viloyati madaniy meros boshqarmasi mutaxassislari tomonidan “Choshtepa-2” arxeologiya yodgorligi hududida o‘rganish ishlari olib borilgan. O‘rganish natijalariga ko‘ra, yodgorlikda yangi qonunbuzarlik holatlari aniqlanmagan.

Agentlik ijtimoiy tarmoqlarda 2026-yil 24-yanvar sanasida tarqatilgan ma’lumotlar aslida 2022-yil fevral oyida sodir bo‘lgan holatlarga tegishli ekanini ma’lum qildi.

Xabarda yozilishicha, 2022-yil fevral oyida mazkur yodgorlik hududida og‘ir texnika vositalari yordamida noqonuniy buzilish holatlari aniqlangan. O‘zbekiston Respublikasi Vazirlar Mahkamasining 2019-yil 30-martdagi 265-son qarori bilan tasdiqlangan metodika asosida o‘tkazilgan hisob-kitoblarga ko‘ra, yodgorlikka jami 4 mlrd 573 mln 800 ming so‘m miqdorida moddiy zarar yetkazilgani aniqlangan va bu bo‘yicha tegishli dalolatnoma rasmiylashtirilgan.

Mazkur holat yuzasidan Samarqand viloyati madaniy meros boshqarmasi tomonidan 2022-yil 5-apreldagi 01-06/279-sonli rasmiy xat orqali huquqni muhofaza qiluvchi organlarga murojaat qilingan hamda jinoyat ishi qo‘zg‘atilgan.

Ma’lumot uchun, “Choshtepa-2” arxeologiya yodgorligi I–VIII asrlarga oid bo‘lib, Vazirlar Mahkamasining 2019-yil 4-oktyabrdagi 846-son qaroriga muvofiq Moddiy madaniy meros ko‘chmas mulk obyektlari milliy ro‘yxatiga 1128-raqam bilan kiritilgan. Ushbu qaror asosida yodgorlik Samarqand viloyati madaniy meros boshqarmasiga operativ boshqaruv huquqi bilan biriktirilgan.