Qirgʻiziston Milliy banki valyuta ayirboshlash byurosiga oid yangi qoidalarni tasdiqladi. Unga koʻra, 14-yanvardan mamlakatda valyuta ayirboshlash shoxobchalari mijozlarning yirik yoki nostandart amaliyotlarida ularning hujjatlari va pul manbasini tekshirish huquqiga ega bo‘ladi. Bu haqda 24.kg xabar berdi.

Ushbu tartib mamlakat fuqarolari va xorijliklar uchun teng amal qiladi. Regulyatorning tushuntirishicha, bu qaror daromadlarni legallashtirish va moliyaviy jinoyatlarga qarshi kurashish uchun qabul qilingan.

Ayirboshlash shoxobchalari uchun joriy etilayotgan majburiyatlar:

• - mijozlarni, shu jumladan, chet elliklarni va ularning hujjatlarini tekshirish;
• - mablag‘lar manbaini aniqlashtirish (zarurat bo‘lganda);
• - yirik va g‘ayrioddiy operatsiyalarga alohida e’tibor qaratish;
• - shubhali operatsiyalarni to‘xtatib turish va bu haqda Qirg‘iziston Respublikasi Milliy bankini xabardor qilish;
• - valyuta ayirboshlash operatsiyalari bo‘yicha ma’lumotlarni kamida besh yil davomida saqlash.