Oila va xotin-qizlar qo'mitasi tomonidan tashkil etilgan “Yil ayoli” milliy tanlovining respublika bosqichi gʻoliblarini taqdirlash marosimi boʻlib oʻtdi.

Unda Kattaqoʻrgʻon shahridagi “Anvarjon business invest” MCHJ rahbari Gulmira Jumayeva Gran-pri sohibi boʻldi hamda Oʻzbekiston Respublikasi Prezidentining sovgʻasi – avtomobil bilan taqdirlandi.

Gulmira Jumayeva uzoq yillar davomida Rossiya Federatsiyasida mehnat migratsiyasida boʻlib, chiqindilarni qayta ishlash korxonasida faoliyat yuritgan. 2016-yilda O‘zbekistonga qaytib, atrof-muhit ifloslanishining oldini olish, aholidan chiqadigan maishiy chiqindilarni qayta ishlashga qaratilgan faoliyatni yoʻlga qoʻygan. Ayni vaqtga qadar Gulmira Jumayeva 5 ta masʼuliyati cheklangan jamiyatni tashkil etib, 450 ga yaqin yoshlar va xotin-qizlar uchun doimiy ish oʻrinlari yaratgan.