10-dekabr kuni Hyundai Rotem kompaniyasi Oʻzbekistonga rejalashtirilgan oltita tezyurar poyezdning birinchi partiyasini joʻnatdi. Marosim Janubiy Koreyaning Changvon shahridagi Masan portida boʻlib oʻtdi. Bu haqda Oʻzbekiston Transport vazirligi matbuot xizmati xabar berdi.

Oʻzbekiston delegatsiyasidan bosh vazir oʻrinbosari Jamshid Xoʻjayev, transport vaziri oʻrinbosari Jasurbek Choriyev, “Oʻzbekiston temir yoʻllari” rahbari Zufar Narzullayev tadbirda ishtirok etdi.

Toshkent – Urganch – Xiva yoʻnalishi uchun moʻljallangan hamda Xorazm hukmdori va lashkarboshisi sharafiga “Jaloliddin Manguberdi” nomi bilan atalgan yetti vagonli poyezd muddatidan oldin – 17 oyda qurib bitkazildi, deb yozdi The Korea Times. Xabar qilinishicha, bu Janubiy Koreyaning birinchi tezyurar poyezd eksporti loyihasi.

Tezlashtirilgan tugallash tufayli poyezd Oʻzbekistonga kutilganidek martda emas, balki yanvar-fevralda kelishi kutilmoqda. Qolgan beshta poyezd 2026−2027-yillarda yetkazilishi kutilmoqda.

Poyezd uzunligi – 175 m, sigʻimi – uch toifada taxminan 390 yoʻlovchi: VIP, biznes va ekonom.

Koreya nashrining taʼkidlashicha, modifikatsiyalangan KTX-Eum (EMU-260) poyezdlari 260 km/soat tezlikka erisha oladi. Ular Oʻzbekistonning choʻl iqlimi uchun maxsus ishlab chiqilgan boʻlib, changga, haddan tashqari yuqori va past haroratlarga, qum boʻronlariga chidamli tizimlar bilan jihozlangan hamda uzoq masofalarga sayohat qilish uchun moʻljallangan, deb yozmoqda Electimes.

Poyezd Hyundai Rotem tomonidan Oʻzbekiston temir yoʻllari bilan 2024-yil iyun oyida imzolangan shartnoma doirasida ishlab chiqariladi.

Taʼkidlanishicha, Toshkentdan Xivaga 14 soat harakatlanadigan oddiy poyezddan farqli oʻlaroq, yangi tezkor poyezd manzilga 7 soat 40 daqiqada yetib boradi.